91-годишен тетовец уапсен поради пукање со огнено оружје
Полициските служби од СВР Тетово уапсија 91-годишен жител на Тетово по пријава дека пукал со огнено оружје во раните утрински часови. Настанот се случил вчера, во 01:55 часот, на улицата „116“ во Тетово.
Според официјалните информации, полицијата интервенирала по пријава од неговиот син, 66-годишниот Л.С., кој пријавил дека неговиот татко, Р.С., пукал со пиштол. По пристигнувањето на местото на настанот, полициските службеници го лишиле од слобода Р.С. и тој е задржан во полициска станица за понатамошна постапка.
При увидот што го извршила екипа од СВР Тетово, биле пронајдени и одземени пиштол марка „Црвена Застава“ со калибар 7.65 мм, една рамка со шест неиспукани куршуми, една испукана чаура и проектил од испукан куршум. Оружјето било во легално поседување на Р.С., кој имал дозвола за него.
Истрагата е во тек, а полицијата работи на утврдување на причините за пукањето и евентуалните околности што довеле до инцидентот.