Летото пече, автобусите чадат: Скопјани повторно се варат во расипаниот возен парк на ЈСП

TEMU

#1 Најпродаван артикл

Сет од 5 парчиња заштитник на кабли, прекривка за заштита на кабли од ТПУ, додатоци за заштита на кабли, без батерија, за мобилни телефони, комплет за заштита на податочни линии

4.8 (10276)

54 ден

-73%

206 ден

Купи сега

МАКЕДОНИЈА

Летото пече, автобусите чадат: Скопјани повторно се варат во расипаниот возен парк на ЈСП

17 јуни 2026

• од Темелко Тошев

Високите летни температури повторно ги извадија на површина долгогодишните проблеми со јавниот превоз во главниот град. И ова лето, скопјани се сведоци на познатата слика – автобуси на ЈСП кои се расипуваат, чадат и остануваат во дефект низ скопските улици.

Ова не е нов проблем. Граѓаните на Скопје со години се соочуваат со истиот предизвик, особено во текот на летните месеци кога екстремните горештини дополнително го оптоваруваат веќе дотраениот возен парк. Видеата кои беа снимени и споделувани изминатата недела покажуваат автобуси во дефект на различни локации низ градот, што е само уште еден потсетник на проблемите кои се повторуваат речиси секоја летна сезона.

Град Скопје: Наследивме хаварисан возен парк, но состојбата се подобрува

Од Град Скопје во изјава за порталот „Скопје1“ појаснуваат дека состојбата во Јавното сообраќајно претпријатие (ЈСП) била сериозно нарушена во моментот кога новото раководство ја презело одговорноста за управување со истото.

„Кога градоначалникот Орце Ѓорѓиевски ја презеде одговорноста, состојбата во ЈСП беше сериозна. Имаше околу 130 автобуси кои беа во функција, целосно запуштено претпријатие и хаварисан возен парк“, велат од Град Скопје.

Од градската администрација додаваат дека, благодарение на интензивното сервисирање и вложувањата во претпријатието, бројката на функционални возила сега е зголемена. Во моментов, по улиците на Скопје сообраќаат околу 180 автобуси.

Покрај зголемениот број на возила на улиците, од Градот се пофалија и со финансиска стабилизација:

„Дополнително, и покрај вложувањата во поправки и одржување, успеавме во првите шест месеци да направиме заштеди од околу 1 милион евра во споредба со истиот период минатата година.“

Старите автобуси остануваат предизвик, се чека помош од Владата

И покрај напорите за сервисирање, надлежните признаваат дека возниот парк е стар и оти дефектите не можат целосно да се елиминираат.

„Факт е дека автобусите не се нови и дека кај стар возен парк секогаш постои можност за дефекти, но нашата цел е тие проблеми да ги сведеме на минимум и граѓаните да добијат навремен и квалитетен јавен превоз“, наведуваат од Град Скопје.

Како трајно решение на овој децениски проблем, од Градот најавуваат продолжување на активностите за обновување на возниот парк. Големите очекувања се насочени кон најавената поддршка од Владата, преку која јавниот транспорт во Скопје треба да биде засилен со 100 нови автобуси.

Сепак, додека се чека реализацијата на оваа набавка, скопјани и ова лето ќе мора да се вооружат со трпение. Возењето во автобуси кои често се соочуваат со дефекти останува секојдневие, потврдувајќи дека јавниот превоз и понатаму е еден од најголемите инфраструктурни предизвици во главниот град.