Базенот „Борис Трајковски“ затворен на две години: По невремето следи целосна реконструкција

TEMU

#1 Најпродаван артикл

Сет од 5 парчиња заштитник на кабли, прекривка за заштита на кабли од ТПУ, додатоци за заштита на кабли, без батерија, за мобилни телефони, комплет за заштита на податочни линии

4.8 (10276)

54 ден

-73%

206 ден

Купи сега

МАКЕДОНИЈА

Базенот „Борис Трајковски“ затворен на две години: По невремето следи целосна реконструкција

31 јули 2026

• од Темелко Тошев

Скопскиот базен во рамките на Спортскиот центар „Борис Трајковски“ ќе остане затворен за посетители во следните две години. Одлуката за целосна реконструкција на објектот доаѓа откако во силното невреме кое го зафати Скопје на 21 јули, кровот на базенот беше откорнат, при што делови од него паѓаа директно во патеките за пливање додека внатре сè уште имало посетители, што резултираше со итна евакуација.

Директорот на базенот, Даниел Апостоловски, истакнува дека објектот нема да биде пуштен во употреба сè додека не се заврши неговата целосна санација.

„Базенот и пред невремето беше во лоша состојба и му требаше итна санација. По невремето одлета кровот и сега нема да правиме никакви интервенции само на него, туку објектот ќе биде затворен додека целосно не се реновира“, изјави Апостоловски. Тој додаде дека проектот е веќе готов, а во претстојниот период ќе биде распишан тендер за избор на изведувач. Очекувањата се дека градежните работи ќе започнат во ноември, а реконструкцијата ќе опфати сè – од машинската соба до самиот покрив.

Според проектната документација, градежните зафати ќе траат помеѓу 12 и 18 месеци. Кога на ова ќе се додадат потребните месеци за спроведување на тендерската постапка, изборот на фирма и потпишувањето на договорот, се проценува дека скопјани ќе останат без овој спортски објект околу две години.

Ова не е првпат базенот да се соочува со инфраструктурни проблеми. Објектот беше реновиран во 2010 година, но минатата година претрпе оштетувања кога падна летва од таванот. Тогаш, директорот Апостоловски посочи дека проблемот настанал поради неквалитетно претходно реновирање и најави целосна санација. Како привремено решение, за време на таа петмесечна санација, на таванот беше поставено заштитно црно платно.

Сега, по разорното невреме, базенот влегува во фаза на темелна обнова која треба конечно да ги реши долгогодишните проблеми и да обезбеди максимална сигурност за идните пливачи.