Битиќи: Ребалансот е фактура за владиниот дебакл – дефицитот руши рекорди, а се крати од инвестициите и граѓаните

TEMU

#1 Најпродаван артикл

Сет од 5 парчиња заштитник на кабли, прекривка за заштита на кабли од ТПУ, додатоци за заштита на кабли, без батерија, за мобилни телефони, комплет за заштита на податочни линии

4.8 (10276)

54 ден

-73%

206 ден

Купи сега

МАКЕДОНИЈА

Битиќи: Ребалансот е фактура за владиниот дебакл – дефицитот руши рекорди, а се крати од инвестициите и граѓаните

08 јули 2026

• од Темелко Тошев

Пратеникот на СДСМ, Фатмир Битиќи, упати остри критики за предложениот ребаланс на Буџетот за време на седницата на собраниската Комисија за финансирање и буџет. Тој го оцени предлогот како јасен доказ за неуспешното буџетско планирање на Владата, категорично отфрлајќи ги обидите тој да се претстави како развојна мерка.

„Додека власта се обидува да го прикаже ребалансот како развоен, суровите бројки покажуваат тотален колапс и неодговорно планирање. Ова не е инструмент на одговорно управување со јавните финансии, туку фактура за промашениот буџет донесен во декември. Буџетот не издржа ниту половина година, а цената сега ја плаќаат граѓаните“, истакна Битиќи пред пратениците.

„Финансиска обдукција“ на промашеното планирање

Битиќи во своето излагање се осврна на конкретни бројки, посочувајќи дека со ребалансот буџетскиот дефицит драстично се зголемува:

Вкупниот дефицит скока од 39,2 на 46,2 милијарди денари (зголемување за околу 7 милијарди).
Учеството во БДП расте од 3,5% на 4,1%.
Примарниот дефицит бележи раст од дури 40%.

„Овој ребаланс е финансиска обдукција на промашеното владино планирање. Бројките зборуваат погласно од владиниот ПР. Растот на примарниот дефицит од 40 проценти јасно покажува дека проблемот не се наследените долгови, туку актуелните политики на Владата“, порача пратеникот на СДСМ.

Се крати таму каде што треба да има развој

Наспроти најавите за економски развој, Битиќи алармираше дека Владата ги намалува средствата токму во клучните сектори кои треба да генерираат економски раст. Според неговите податоци:

Програмата за економски развој се намалува од 8 на 7,3 милијарди денари.
Поддршката за унапредување на деловните активности се крати за над 76%.
Намалени се средствата за финансиска поддршка на инвестициите и за малите и средните претпријатија.

„Нема продуктивна економија без инвестиции. Нема повисоки плати без поголема додадена вредност, ниту извоз без технолошка модернизација“, нагласи тој.

Удар врз најранливите и вртоглав раст на долгот

Освен економијата, на удар се и социјалните политики. Битиќи обвини дека се кратат средствата наменети за намалување на сиромаштијата и поттикнување на вработувањето.

„Владата крати кај најранливите, а го зголемува трошењето. Кога имате милијарди за проширување на дефицитот, а немате средства за инклузија и активни мерки за вработување, тогаш проблемот не е во парите, туку во приоритетите“, посочи Битиќи.

Дополнително, тој предупреди на загрижувачките трендови во задолжувањето, истакнувајќи дека јавниот долг се движи кон 61,5% од БДП, додека нето-странското задолжување бележи раст за повеќе од 16 милијарди денари.

Стабилни пензии само со силна економија

На крајот од своето обраќање, Битиќи се осврна и на пензискиот систем. Тој потенцираше дека пензионерите не се товар на државата, бидејќи тоа се луѓе кои чесно работеле и плаќале придонеси. Сепак, тој предупреди дека одржливост на системот не е можна без повисока продуктивност и повеќе формални работни места.

„Достоинствени пензии не се обезбедуваат со политички пароли, туку со стабилна економија. Овој ребаланс покажува дека Владата нема план за развој, туку план за нови долгови“, заклучи пратеникот.