ЕТИАС станува задолжителен и за македонските граѓани: Електронската пријава ќе чини 20 евра

TEMU

#1 Најпродаван артикл

Сет од 5 парчиња заштитник на кабли, прекривка за заштита на кабли од ТПУ, додатоци за заштита на кабли, без батерија, за мобилни телефони, комплет за заштита на податочни линии

4.8 (10276)

54 ден

-73%

206 ден

Купи сега

МАКЕДОНИЈА

ЕТИАС станува задолжителен и за македонските граѓани: Електронската пријава ќе чини 20 евра

14 септември 2026

• од Темелко Тошев

Македонските граѓани кои планираат да патуваат во земјите од Шенген-зоната во иднина ќе мора да обезбедат електронско одобрение за патување преку новиот европски систем – ЕТИАС. Оваа пријава ќе се пополнува онлајн, а за најголемиот дел од патниците ќе чини 20 евра.

Сепак, граѓаните засега можат да бидат мирни. ЕТИАС системот сè уште не е ставен во функција, што значи дека во моментов не е потребно да се поднесува пријава ниту да се плаќа надомест. Според најавите од Европската Унија, системот се очекува да започне со примена во последниот квартал од 2026 година, а точниот датум ќе биде дополнително објавен на официјалната страница на ЕТИАС.

Што е ЕТИАС и што значи за македонските граѓани?

ЕТИАС (Европски систем за патни информации и одобрување) не претставува виза, туку електронска дозвола наменета за државјаните на земјите кои имаат безвизен режим со ЕУ, вклучувајќи ја и Северна Македонија.

Со воведувањето на овој систем нема да се променат правилата за престој. Македонските граѓани и понатаму ќе можат да престојуваат во Шенген-зоната најмногу 90 дена во период од 180 дена за туристички, деловни, транзитни или приватни цели. Важно е да се напомене дека ЕТИАС не дозволува вработување, долгорочен престој или студирање подолго од 90 дена. За тие цели и понатаму ќе биде потребна соодветна национална виза или дозвола за престој.

Како ќе изгледа процедурата и колку ќе важи?

При аплицирањето, патниците ќе треба да внесат лични податоци, информации од пасошот, контакт и адреса на живеење, како и да одговорат на прашања поврзани со безбедноста. Податоците потоа автоматски ќе се проверуваат во европските безбедносни бази. Во најголем број случаи, пријавите ќе бидат обработени и одобрени за само неколку минути.

Одобреното патно овластување електронски ќе се поврзува со пасошот и ќе важи три години, или до истекот на самиот пасош – во зависност од тоа што ќе се случи прво. Доколку извадите нов пасош, ќе мора да поднесете и нова пријава за ЕТИАС.

Кој ќе биде ослободен од плаќање?

Таксата за ЕТИАС, според Европската комисија, е зголемена од првично планираните 7 на 20 евра. Сепак, од плаќање ќе бидат ослободени лицата помлади од 18 и постари од 70 години. Иако овие категории граѓани нема да плаќаат, тие сепак ќе мора да извадат електронско одобрение за да можат да патуваат.

Системот ќе се применува за влез во 30 европски земји (меѓу кои Грција, Германија, Италија, Франција и други), а едно одобрение ќе важи за сите држави кои се дел од системот.

Откако ЕТИАС ќе стане задолжителен, патниците без важечко одобрение нема да можат да се качат во авион, автобус или брод кон ЕУ. Исто така, самото одобрение не гарантира сигурен влез во земјата – конечната одлука останува на граничната полиција.

Внимание: Чувајте се од измами

Европската Унија апелира до граѓаните да бидат внимателни и да не аплицираат преку неофицијални веб-страници кои веќе нудат „ЕТИАС дозволи“. Бидејќи системот сè уште не е активен, во моментов е невозможно да се поднесе официјална и валидна пријава.