Филипче: Поднесуваме закон за минимална плата од 600 евра, граѓаните не можат да го преживеат месецот

TEMU

#1 Најпродаван артикл

Сет од 5 парчиња заштитник на кабли, прекривка за заштита на кабли од ТПУ, додатоци за заштита на кабли, без батерија, за мобилни телефони, комплет за заштита на податочни линии

4.8 (10276)

54 ден

-73%

206 ден

Купи сега

МАКЕДОНИЈА

Филипче: Поднесуваме закон за минимална плата од 600 евра, граѓаните не можат да го преживеат месецот

11 септември 2026

• од Темелко Тошев

Пратеничката група на СДСМ и коалицијата по третпат во Собранието поднесуваат Предлог-закон за зголемување на минималната плата. Со овој законски предлог, опозицијата бара минималецот да се покачи на 600 евра, односно 36.960 денари. Ова денеска на прес-конференција во законодавниот дом го соопшти претседателот на СДСМ, Венко Филипче.

Филипче посочи дека актуелната минимална плата од 26.000 денари е апсолутно недоволна за квалитетен и достоинствен живот, особено во услови на криза, високи цени на горивата и континуирано поскапување на прехранбените производи.

„Над 70 проценти од работниците во земјава живеат со примања помеѓу минималната и просечната плата. Во услови кога синдикалната кошничка изнесува близу 70.000 денари, односно над 90.000 денари доколку се пресметаат и трошоци за кирија или кредит за стан, сегашната минимална плата покрива едвај 31 до 37 проценти од вкупните трошоци на едно семејство“, истакна Филипче.

Тој аргументираше дека речиси целата актуелна минимална плата, околу 25.000 денари, се троши исклучиво на храна и безалкохолни пијалоци. Доколку на тоа се додадат тековните трошоци за школски прибор кои изнесуваат околу 7.000 денари, трошоците за транспорт од 5.000 денари, за облека 6.000 денари и за здравство над 1.100 денари, Филипче предупреди дека „работничките семејства практично не можат да го преживеат месецот“.

Од каде пари за покачувањето?

На прашањето како ќе се финансира оваа мерка, лидерот на СДСМ објасни дека средствата можат да се обезбедат преку кратење на луксузните буџетски трошоци. Тој тука ги посочи набавките на мебел, автомобили и патните трошоци на функционерите. За да не се оптовари приватниот сектор, предлогот предвидува државно субвенционирање на придонесите за компаниите.

Филипче упати и остри критики кон актуелната власт за, како што рече, „неотчетно и нетранспарентно трошење народни пари за луксузни забави и прослави“, посочувајќи го неодамнешниот концерт за кој обвини дека премиерот излажал оти чинел нула денари.

Заштита за родилките и критики за енергетиката и судството

Покрај законот за минималната плата, СДСМ поднесува и законски измени за заштита на правата на бремените жени и родилките. Со нив ќе се овозможи неискористениот годишен одмор поради породилно отсуство, да може да се користи до крајот на декември следната година, наместо до крајот на јуни како што е досегашната пракса.

Филипче призна дека не очекува поддршка од власта за овие закони, обвинувајќи ја дека не се грижи за граѓаните.

Осврнувајќи се на актуелните општествени теми, претседателот на СДСМ предупреди на лошо менаџирање во енергетскиот сектор и пад на домашното производство, поради што очекува поскапување на струјата и на парното. За одлуката на Врховниот суд да ја укине пресудата за случајот „Ласкарци“, тој потенцираше дека довербата во правосудството е исклучително ниска и дека единствениот излез е европскиот пат и отворањето на преговорите со ЕУ, што ќе донесе судови кои ќе работат по европски критериуми.