Нов удар за економијата: Германскиот гигант БМЗ ја затвора фабриката во Илинден и се сели во Полска

TEMU

#1 Најпродаван артикл

Сет од 5 парчиња заштитник на кабли, прекривка за заштита на кабли од ТПУ, додатоци за заштита на кабли, без батерија, за мобилни телефони, комплет за заштита на податочни линии

4.8 (10276)

54 ден

-73%

206 ден

Купи сега

МАКЕДОНИЈА

Нов удар за економијата: Германскиот гигант БМЗ ја затвора фабриката во Илинден и се сели во Полска

29 јули 2026

• од Темелко Тошев

Германската компанија „БМЗ Груп“ (BMZ Group), светски познат производител на литиум-јонски батерии, донесе конечна одлука целосно да го затвори својот производствен погон во општина Илинден до крајот на 2026 година. Производството ќе биде преселено во Полска, а оваа деловна одлука директно ќе погоди речиси 90 вработени во скопскиот погон, оставајќи ги без работа и ставајќи крај на најавите за големи вработувања.

Транзицијата започнува во август

Според официјалното соопштение на БМЗ објавено на нивната веб-страница, компанијата го консолидира своето европско производство.

„БМЗ ќе го затвори својот погон во Илинден и ќе го предаде целиот производствен бизнис на БМЗ Полска. Одлуката влијае на 89 вработени во погонот во Северна Македонија“, се вели во известувањето.

Префрлањето на производството ќе се одвива во фази, почнувајќи од август до декември 2026 година. Локацијата кај Скопје ќе продолжи да работи до крајот на годината за да се обезбеди непречено примопредавање на бизнисот. Од компанијата истакнуваат дека сите клиенти се веќе контактирани, снабдувањето ќе продолжи без прекини, а менаџментот веќе започнал индивидуални разговори со секој од засегнатите вработени во Скопје.

Од 1.000 најавени вработувања до клуч на врата

Затворањето на оваа фабрика доаѓа како студен туш, особено ако се земат предвид помпезните најави при поставувањето на камен-темелникот во септември 2024 година, настан на кој присуствуваше и државниот врв. Тогаш беше најавена огромна инвестиција вредна 65 милиони евра, која требаше да биде завршена до мај 2025 година.

Првичните планови на раководството ветуваа отворање на дури 1.000 нови работни места и извоз од најмалку 60 милиони евра во првите три години. Денес, неполни две години подоцна, амбициозните планови згаснаа, а деведесетината ангажирани работници се соочуваат со отказ.

Трета странска компанија што ја напушта Македонија

Заминувањето на БМЗ претставува сериозен аларм за инвестициската клима во земјата. Ова е веќе трета странска компанија што ја напушта Македонија за релативно краток период. Претходно, своите погони ги затворија ирско-американската компанија „Аптив“ во ТИРЗ „Бунарџик“, како и американската „Дура“. Дополнително, британскиот гигант „Џонсон Мети“, кој е најголем извозник од Македонија, неодамна најави намалување на бројот на своите вработени.

Дали доцнењето на државната помош е главниот проблем?

Иако институциите континуирано најавуваат привлекување на нови инвеститори, постоечките странски компании во земјава веќе извесен период алармираат за административни и финансиски пречки. Главниот проблем, според нивните реакции, лежи во нередовната исплата на државната помош која законски им следува.

Ова прашање беше директно отворено на средбата на странските инвеститори со премиерот Христијан Мицкоски и владиниот економски тим во март годинава, кога инвеститорите посочија дека државната помош доцнела за првпат откако е воведена оваа практика. Покрај ова, тие реагираат и на бирократските проблеми со работните дозволи, предизвиците со транспортот и слабата поддршка од државните институции по иницијалното инвестирање (т.н. aftercare).

Зрак надеж: Се бара нов инвеститор за погонот

Додека БМЗ се подготвува за заминување, од Дирекцијата за технолошко-индустриски развојни зони (ТИРЗ) изразуваат оптимизам. Од таму најавуваат дека деновиве очекуваат разговори со друг странски инвеститор од Европската Унија, кој евентуално би го презел веќе постоечкиот погон на БМЗ во Илинден, со што би се ублажиле последиците од затворањето на германската фабрика.