Нови блокади на Кожуф: Активисти нема да дозволат механизација да стигне до Дошница

TEMU

#1 Најпродаван артикл

Сет од 5 парчиња заштитник на кабли, прекривка за заштита на кабли од ТПУ, додатоци за заштита на кабли, без батерија, за мобилни телефони, комплет за заштита на податочни линии

4.8 (10276)

54 ден

-73%

206 ден

Купи сега

МАКЕДОНИЈА

Нови блокади на Кожуф: Активисти нема да дозволат механизација да стигне до Дошница

01 август 2026

• од Тодор Вангелов

Еко-активисти и граѓански иницијативи повторно организираат блокади на планината Кожуф за да ја спречат изградбата на малите хидроцентрали „Баров Дол“ и „Папрад“ на реката Дошница, објави Мета.мк. Блокадите започнуваат денеска и, според најавите, ќе траат до крајот на годината.

Според Мета.мк, граѓанските иницијативи од Југоисточниот регион ги повикаа граѓаните да им се придружат на блокадите на планинскиот пат, со цел да не се дозволи механизацијата да пристигне до локацијата каде што се планирани градежните работи. За протестите веќе е известено Министерството за внатрешни работи.

Активистите бараат пред почетокот на какви било градежни активности да биде изработена независна стручна анализа за влијанието врз живиот свет и природата во подрачјето. Тие истовремено повторно ја отвораат иницијативата Кожуф да биде прогласен за национален парк, оценувајќи дека тоа е најдобриот начин за долгорочна заштита на планината.

„Добивме информација дека дозволите за изградба на мали хидроцентрали на Дошница се издадени, иако уште пред три години јасно кажавме дека нема да дозволиме да се уништи реката и сѐ уште стоиме на тој став“, изјави за Мета.мк Марина Томова од иницијативата „Чејнџмејкерс“, повикувајќи ги граѓаните да се приклучат на блокадите или да помогнат со донации за нивно одржување.

Како што пренесува Мета.мк, локалните еколошки организации, заедно со општините Кавадарци, Демир Капија и Гевгелија, финансираат студии што треба да ги изработат 13 експерти. Анализите ќе утврдат дали во сливот на Дошница има ендемски или загрозени растителни и животински видови кои би биле загрозени од изградбата на хидроцентралите. Студиите треба да се изработуваат во следните две години.

Екологистите предупредуваат дека малите хидроцентрали можат да предизвикаат сериозни последици врз речните екосистеми и повторуваат дека проектите носат ограничени економски придобивки во споредба со влијанието врз природата.

Во јуни годинава, на форумот „Дијалог за иднината на Кожуф“, организиран од Центарот за климатски промени, беше заклучено дека е потребна сеопфатна теренска анализа на биолошката разновидност, пределските карактеристики и социо-економските аспекти на подрачјето за да се утврдат природните вредности и можниот степен на заштита на Кожуф. Според експертите, планината е дом на повеќе ендемски и ретки видови и е дел од Емералд мрежата според Бернската конвенција.

Мета.мк потсетува дека Владата во јануари годинава донесе одлука со која му овозможи на концесионерот „Хидро Дошница“ ДОО Скопје да ја продолжи концесијата за малите хидроцентрали „Баров Дол“ и „Папрад“, откако беше утврден застој во реализацијата на проектот кој, според владината одлука, не бил по вина на концесионерот.