Пожарот кај Кавадарци повторно се разгоре, се сомневаат на подметнување

TEMU

#1 Најпродаван артикл

Сет од 5 парчиња заштитник на кабли, прекривка за заштита на кабли од ТПУ, додатоци за заштита на кабли, без батерија, за мобилни телефони, комплет за заштита на податочни линии

4.8 (10276)

54 ден

-73%

206 ден

Купи сега

МАКЕДОНИЈА

Пожарот кај Кавадарци повторно се разгоре, се сомневаат на подметнување

03 август 2026

• од Стефан Николов

Пожарот кај кавадаречкото село Раовец денеска повторно се реактивираше со силен интензитет, а во неговото гаснење се вклучени авиони, хеликоптери и бројни копнени екипи. Надлежните предупредуваат дека огнот тешко ќе биде ставен под контрола во текот на денот.

Директорот на Дирекцијата за заштита и спасување, Стојанче Ангелов, изјави дека пожарот се проширил кон тешко пристапен терен во близина на Тиквешкото Езеро. Поради тоа, покрај два „ер трактори“, во акцијата се вклучуваат и полициски и армиски хеликоптер.

Според Ангелов, постојат сериозни индиции дека пожарот е намерно подметнат. Тој рече дека огнот бил запален на пет различни локации во исто време, што овозможило брзо ширење, а додаде и дека полицијата најверојатно веќе го привела осомничениот.

Во гаснењето учествуваат четири пинцгауери, два унимога, камион на Шумското стопанство, повеќе теренски возила, два авиона на Дирекцијата за заштита и спасување, како и хеликоптери на Министерството за внатрешни работи и Армијата. На терен се и екипи на Територијалната противпожарна единица, полицијата и Шумското стопанство.

Градоначалникот на Кавадарци, Митко Јанчев, соопшти дека сите расположливи ресурси се ангажирани за локализирање на пожарот и апелираше граѓаните да не се приближуваат до загрозеното подрачје, да ги следат насоките на надлежните служби и веднаш да пријават евентуални нови жаришта или сомнителни активности.

Ангелов информираше дека денеска низ државата се регистрирани повеќе од десет пожари. Иако засега повеќето се од помал обем, високите температури и засилениот ветер го отежнуваат нивното гаснење и постои можност дел од нив да останат активни и во текот на ноќта.