СДСМ: ММФ потврдува – Македонија со низок економски раст и инфлација од 3,4%
Според најновите проекции на Меѓународниот монетарен фонд (ММФ), Македонија се соочува со загрижувачка економска иднина – ниска стапка на раст од 3,2% и инфлација од 3,4% во 2025 година. Овие бројки, како што истакна СДСМ на денешната прес-конференција, ја позиционираат земјата на дното во регионот по економски перформанси, пред само Босна и Херцеговина.
Портпаролката на СДСМ, Богданка Кузеска, предупреди дека ваквите резултати се показател за целосна економска стагнација.
„Ова не е реформа, ова е економска капитулација. Со речиси нула реален раст и инфлација која им ги јаде заштедите на граѓаните, животот станува се’ потежок, а стандардот продолжува да опаѓа“, изјави Кузеска.
Според СДСМ, стагнацијата на платите и растечките трошоци го влошуваат секојдневието на граѓаните, а Владата, наместо да нуди решенија, се занимава со козметички мерки и политички маркетинг.
„Оваа Влада не го води народот напред – туку го турка наназад. Тоа не го велиме само ние, туку и ММФ“, нагласи Кузеска.
СДСМ бара итно преструктурирање на економските политики, со фокус на продуктивност, инвестиции во реалната економија и вистинска борба против сиромаштијата.