Костовски: Тошковски диригира селективна истрага и правна фарса за најголемата трагедија во Македонија

Организацискиот секретар на СДСМ, Мартин Костовски, жестоко ја нападна власта и министерот за внатрешни работи Панче Тошковски, обвинувајќи ги за селективна истрага и правна фарса во врска со трагедијата во Кочани, која ја нарече „најголемата трагедија во поновата историја на Македонија“. Во гостување на телевизија Канал 5, Костовски посочи дека наместо вистинска правда за жртвите и нивните семејства, институциите под диригенцијата на Тошковски и лидерот на ВМРО-ДПМНЕ, Христијан Мицкоски, ја користат истрагата како параван за политичка заштита на одредени лица.

„Правдата мора да се испорача на граѓаните и на семејствата на загинатите и повредените. Но, наместо тоа, сведочиме на селективен пристап и правна фарса која само ја продлабочува недовербата во системот“, изјави Костовски.

Тој остро се осврна на улогата на Министерството за внатрешни работи во самата несреќа, посочувајќи дека сè уште нема одговор на клучните прашања: кој дал дозвола за користење пиротехнички средства, дали полициски службеници биле на местото каде што имало малолетници, и зошто институциите не реагирале навреме.

„МВР има обврска да даде конкретни одговори, но тие молчат. Во таква ситуација, мора да има морална одговорност. Панче Тошковски треба да поднесе оставка – трагедијата се случи во негов мандат“, потенцираше Костовски.

Според него, полноќните прес-конференции на премиерот, на кои се презентираа делови од доказната постапка, дополнително го нарушиле кредибилитетот на истрагата, бидејќи оставиле впечаток дека се води со цел да се заштитат лица вработени во МВР, Пазарната инспекција и УЈП.

„Истрагата не може да се сведува на поранешни функционери, додека актуелните се оставени без никакви мерки. Обвинителот кој требаше да биде сменет, одеднаш стана прифатлив за власта. Сето ова создава сомнеж дека истрагата се користи за политички цели“, изјави тој.

Костовски заклучи дека граѓаните сè погласно ја изразуваат својата недоверба во правосудниот систем и се сомневаат дека вистинските одговорни лица ќе останат недопирливи. Според него, без вистинска и независна истрага, нема да има ни правда, ни мир за оние што ги загубија своите најблиски.