Протестен марш во чест на загинатите во трагедијата во Кочани
Денеска, во 16 часот, улиците на Кочани беа исполнети со тага, болка и тишина. Родителите, семејствата, роднините, пријателите и сограѓаните на младите кои трагично ги загубија животите во пожарот во дискотеката „Пулс“ организираа протестен марш низ градот.
Со фотографии од своите најмили во рацете и со солзи во очите, родителите, браќата, сестрите и блиските на жртвите чекореа низ Кочани. Овој „Марш на ангелите“ е нивен начин да ја изразат својата болка, да повикаат на солидарност и да испратат јасна порака до јавноста и институциите.
„Ова е нашиот начин да ја одбележиме болката, да побараме правда и да ги потсетиме институциите дека не смееме да дозволиме ваква трагедија да се повтори,“ стоеше во најавата на мирниот протест.
Трагедијата се случи во раните утрински часови на 16 март годинава, кога избувна пожар во дискотеката „Пулс“. Животот го загубија 62 млади лица од Кочани, Штип, Виница, Пробиштип, Струмица, Облешево и Скопје, а околу 200 лица беа повредени.
Маршот денеска не беше само израз на тагата, туку и повик за правда, одговорност и промени што ќе го спречат повторувањето на вакви несреќи. Граѓаните на Кочани и пошироко остануваат обединети во болката, но и во борбата за подобро утре.