Денеска 1 септември се празнува Светиот маченик Андреј Стратилат

TEMU

#1 Најпродаван артикл

Сет од 5 парчиња заштитник на кабли, прекривка за заштита на кабли од ТПУ, додатоци за заштита на кабли, без батерија, за мобилни телефони, комплет за заштита на податочни линии

4.8 (10276)

54 ден

-73%

206 ден

Купи сега

МАКЕДОНИЈА

Денеска 1 септември се празнува Светиот маченик Андреј Стратилат

01 септември 2026

• од Темелко Тошев

Православната црква и нејзините верници денеска го одбележуваат споменот на Светиот маченик Андреј Стратилат, храбар римски офицер кој заради својата вера во Исус Христос маченички пострада заедно со своите 2.593 војници.

Андреј бил роден во Сирија и служел како офицер-трибун во римската војска за време на владеењето на царот Максимијан. Неговата храброст и лидерство дошле до израз кога Персијците го загрозиле римското царство. Тогаш на Андреј му била доверена војската за да се спротивстави на непријателите, по што бил унапреден во чин војвода, односно стратилат.

Иако во тоа време сè уште не бил крстен, тој бил потаен христијанин кој силно верувал во живиот Бог. Пред клучната битка, Андреј одвоил одред од најдобрите војници и им порачал дека доколку искрено Го повикаат на помош единствениот вистински Бог – Исус Христос, непријателот ќе се распрсне како прав пред нив. Вдахновени од неговата силна вера, војниците го послушале, извршиле силен јуриш и до нога ја сотреле многубројната персиска војска.

Но, по триумфалното враќање во Антиохија, наместо слава, Андреј се соочил со предавство. Завидливците го обвиниле кај царскиот намесник дека е христијанин. Повикан на суд, тој не ја криел својата вера, туку отворено и гордо го признал Христа. По тешките мачења, намесникот го фрлил во затвор и побарал инструкции од царот во Рим. Свесен за огромниот углед што Андреј го уживал меѓу народот и војниците, царот наредил привремено да биде ослободен, но тајно да се чека прва прилика за тој да биде ликвидиран.

Преку Божјо откровение, Андреј дознал за подмолниот план на царот. Без двоумење, тој ги зел своите 2.593 верни војници и заминал во Тарс Киликиски, каде сите заедно биле крстени од епископот Петар. Знаејќи дека царските власти нема да се откажат од прогонот, Андреј и неговата дружина се повлекле во ерменската планина Таврос.

Токму таму, во еден планински теснец додека сите биле обединети во молитва, ги сустигнала римската војска. Без никаков отпор и со желба за маченичка смрт за Христа, сите до еден биле погубени.

Преданието вели дека на местото каде што се излеала нивната маченичка крв, веднаш избил извор со лековита вода која исцелувала од секакви болести. Подоцна, епископот Петар тајно дошол со свои луѓе и достојно ги погребал телата на мачениците, чиј спомен и посветеност на верата Црквата го слави и денес.