ОФИЦИЈАЛНО: Воска Спорт и Гостивар исфрлени во најнизок ранг на натпреварување!
Фудбалската федерација на Македонија (ФФМ) донесе официјална одлука за строги дисциплински мерки против клубовите ФК Воска Спорт АД и ГФК Гостивар АД, поради неодиграни натпревари во последните кола од Првата македонска фудбалска лига (Прва МФЛ).
Според објавеното, Воска Спорт е казнета со одземање на вкупно 18 бодови (9 бодови за секој неодигран натпревар од 29. и 30. коло), како и парични казни од по 25.000 евра за секое прекршување. Од друга страна, Гостивар добива идентична казна: одземање на 18 бодови и парична казна од вкупно 50.000 евра за неодигрување на натпреварите од 30. и 31. коло.
Најзначајна последица од овие одлуки е тоа што по нивната правосилност, двата клуба ќе бидат исфрлени во најнизок ранг на натпреварување и ќе им биде забрането учество во сезоната 2025/2026.
Дополнително, ФФМ ќе преземе активности за враќање на наменските средства во износ од 150.000 евра, кои Воска Спорт ги добила на 10 април 2025 година преку солидарната шема за тековната сезона.
Оваа одлука претставува сериозен удар за двата клуба и испраќа јасна порака за значењето на почитувањето на обврските во македонскиот фудбал.