Прв говор на новиот папа: Човештвото има потреба од Христос како мост до Бога и неговата љубов

Во историски момент за Католичката црква, новиот поглавар папата Лав XIV вечерва за првпат се обрати на верниците од главниот балкон на базиликата „Свети Петар“ во Ватикан. Пред десетици илјади верници кои со нетрпение го чекаа неговото појавување, папата го одржа својот прв говор по изборот на оваа висока и значајна функција.

Со поздравот „Мир со сите вас“, папата ја започна својата порака, повикувајќи на мир и сплотеност меѓу луѓето. „Браќа и сестри, ова е првиот поздрав на воскреснатиот Христос. Сакам да упатам поздрав на мирот што стигнува до вашите семејства. До сите вас, каде и да сте. Нека мирот биде со вас“, изјави папата Лав XIV, предизвикувајќи бурен аплауз и радосни извици од присутната толпа.

Во продолжение на говорот, папата упати силна порака за љубов и заедништво. „Бог нè сака сите, безусловно,“ нагласи тој, изразувајќи и голема почит кон својот претходник, папата Франциск. „Ќе се трудам да го следам неговиот пример“, рече папата Лав XIV, доделувајќи благослов на верниците собрани на плоштадот „Свети Петар“.

Една од клучните пораки на новиот папа беше повикот за изградба на мостови меѓу луѓето и меѓу човекот и Бога. „На човештвото му е потребен Христос како мост до Бога и неговата љубов. Помогнете ни, и да си помагаме едни на други, да градиме мостови,“ повика папата, инспирирајќи чувство на надеж и обнова меѓу верниците.

Говорот заврши со заедничка молитва упатена кон Дева Марија. Папата прочита извадок од светите текстови на латински јазик во чест на светците и Богородица, а на крајот уште еднаш го благослови собранието. Додека оркестарот на карабинерите свиреше во позадина, папата Лав XIV топло мавташе кон верниците, кои со радост ја продолжија прославата на историскиот плоштад.

Со оваа прва порака, новиот папа даде до знаење дека неговиот понтификат ќе биде обележан со повик за мир, љубов и сплотеност, оставајќи силен впечаток кај верниците ширум светот.