Кренар Лога повикува на заеднички албански фронт: „Оваа влада е антиалбанска. Точка.“

Поранешниот министер и истакнат член на крилото на Зијадин Села во Алијансата за Албанците, Кренар Лога, јавно реагираше на најновите политички турбуленции во албанскиот опозициски блок и изјавите на Изет Меџити за можно престројување во коалицијата „Европски Фронт“.

Преку објава на социјалните мрежи, Лога индиректно одговори дека нема намера да се приклучи на новото парламентарно мнозинство, остро критикувајќи ги обидите за коалицирање со владејачките сили.

„Ако некој од едната или другата страна го сонувал сонот на магарето (со волкот) дека ќе нè покани за да нè направи како себе и да земе од нашата национална свест и моралот на победникот на изборите — тоа е наивност, кажано поблаго,“ истакна Лога, додавајќи: „Оваа влада е антиалбанска. Точка. Ајде во заеднички фронт на Албанците.“

Со оваа порака, Лога јасно ја отфрли можноста за политичка соработка со СДСМ и ВМРО-ДПМНЕ, повикувајќи на обединување на сите албански партии околу заедничка платформа.

Меџити, пак, не прецизираше дали Зијадин Села би можел да се приклучи кон движењето ВЛЕН, но остави простор за можни промени во опозициските редови. „Има изјави дека ‘Европски фронт’ веќе не постои. Господинот Таравари тоа го кажа, така што однадвор подобро ја знаат ситуацијата отколку внатре во ‘Фронтот’. Ако Али Ахмети навистина соработува со делови од ВЛЕН, тогаш играта допрва почнува“, изјави Меџити.

Политичката сцена во албанскиот блок се чини дека се наоѓа пред ново престројување, каде се очекува појасна дефиниција на линиите помеѓу опозицијата и власта, но и можност за појава на нови коалиции и политички иницијативи.